An n al Lazil

an n ale vit tanpri
n’a tire kont
n’a jwe marèl ak flè dizè
pou n kabre lajounen
n a fè lago
ak mouche loray
n’a lanbe rèv
n’a peze kafe

n’a plante pwadchous

n’a dòmi reve je klè

nou prale byen lwen

dèyè yon touf powèm rak bwa

tankou de moun fou

pou n voye wòch

kase tèt lanmou

 

an n al lazil cheri

lazil se peyi manman m

se la timoun yo twoke rèv yo

ak douvanjou

pou yo ka pran lalin nan pyèj

 

se la depi nan tan benbo

bayawonn pouse bò granchimen

pou resevwa larèn chantrèl

 

 

Fred Edson Lafortune, An n al Lazil, Trilingual Press / Près trileng, Cambridge, Massachusetts, fevriye 2014, p. 18

Pataje pòs la